ដោយសង្កេតឃើញថា សន្ទុះនៃកំណើនភាពជាម្ចាស់អាជីវកម្មនៅក្នុងព្រះរាជាណាចក្រកម្ពុជាមានការកើតឡើង នៅក្នុងរយៈពេលប៉ុន្នានឆ្នាំចុងក្រោយនេះ។​ បញ្ហា  កង្វះទុន គឺជាឧបសគ្គចម្បងក្នុងការដឹកនាំអាជីវកម្មឲ្យមានដំណើរទៅមុខបានលឿនឆាប់រហ័ស។  អាជីវកម្មដែលបង្កើតឡើងតាមរយៈការចូលរួមហ៊ុនគ្នាច្រើន ដែលមានប្រភពទុនមកពីម្ចាស់លុយជាច្រើនផ្សេងៗគ្នា ក៏អាចជាដំណោះស្រាយមួយចំពោះបញ្ហាកង្វះទុនខាងលើ។​ ប៉ុន្តែ ភាពមិនទុកគ្នា រវាងម្ចាស់លុយ និងម្ចាស់លុយទាំងអស់នោះ ព្រមទាំងភាពមិនទុកទៅលើអ្នកគ្រប់គ្រងផងដែរ  គឺជាឧបសគ្គរារាំងដល់ការបង្កើតអាជីវកម្មហ៊ុនគ្នាខាងលើនេះ។ បញ្ហាធំមួយទៀត គឺក្រុមហ៊ុនទាំងនោះមិនមានប្រព័ន្ធគ្រប់គ្រងខាងក្នុងជា    លក្ខណៈស្តង់ដារនៅឡើយ ដែលបង្ករឲ្យដំណើររបស់អាជីវកម្មមិនបានល្អ និងមានការលួចគៃបន្លំសាច់ប្រាក់របស់ម្ចាស់ហ៊ុនជាដើម ដែលជាកត្តាដឹកនាំឲ្យក្រុមហ៊ុនចុះខ្សោយ និងងាយដួលរលំ(ក្ស័យទុន)។

សៀវភៅមួយក្បាល នឹងអាចជួយដោះស្រាយបញ្ហាប្រឈមខាងលើនេះបាន។ សៀវភៅនេះបានដកស្រងចេញពីច្បាប់ដើមទាំងស្រុង របស់ ICGNដែលបង្កើតជាគោលការណ៍អភិបាលកិច្ចពិភពលោក (GGP) ដើម្បីយកទៅប្រើប្រាស់ប្រកបដោយប្រសិទ្ធភាពខ្ពស់ក្នុងការបង្កើតស្ថាប័នឯករាជ្យមួយ ដែលគេហៅថា ”ក្រុមប្រឹក្សាភិបាល”។ ”ក្រុមប្រឹក្សាភិបាល” ជាស្ថាប័នឯករាជ្យមួយនៅក្នុងក្រុមហ៊ុន ដែលជួយវាយតម្លៃការងារប្រតិបត្តិរបស់អគ្គនាយកប្រតិបត្តិ (CEO)​ និងជាអ្នកណែនាំតម្រង់ទិសដៅត្រឹមត្រូវសម្រាប់អង្គភាពទាំងមូល ដោយ ប្រកាន់ខ្ជាប់នូវស្តង់ដារខ្ពស់ នៃក្រមសីលធម៌អាជីវកម្ម និងធានាថាចក្ខុ    វិស័យ បេសកកម្ម និងគោលដៅរបស់ក្រុមហ៊ុនគឺមានភាពត្រឹមត្រូវ និងចង្អុលបង្ហាញពីគុណតម្លៃរបស់វាឲ្យគេបានឃើញនិងយល់ច្បាស់។ គោលការណ៍អភិបាលកិច្ចពិភពលោក (GGP) រួមមានប្រាំបីគោលការណ៍ធំៗដែលអាចជួយពង្រឹងប្រព័ន្ធអភិបាលកិច្ចរបស់គ្រប់ស្ថាប័ន៖

១.​ តួនាទីនិងការទទួលខុសត្រូវរបស់ក្រុមប្រឹក្សាភិបាល

២. ភាពជាអ្នកដឹកនាំ និងឯករាជ្យភាព

៣. សមាសភាព និងការតែងតាំងតួនាទីអគ្គនាយក-នាយក

៤. វប្បធម៌សាជីវកម្ម

៥. ការត្រួតពិនិត្យហានិភ័យ

៦. ប្រាក់លើកទឹកចិត្ត និងបៀវត្តន៍(Remuneration)

៧. របាយការណ៍សាជីវកម្ម និងសវនកម្ម

៨. សិទ្ធិរបស់ម្ចាស់ភាគហ៊ុន

គោលការណ៍ទាំងអស់នេះនឹងត្រូវគេណែនាំឲ្យអនុវត្តន៍តាមលំដាប់លំដោយនៅក្នុងសៀវភៅនេះ។

ដោយ៖ លោក សយ​ តារាទីតូ, ACCA UK